LAOAG CITY – Mangiyuswat ti senado ti imbestigasyon intono Hulyo 1 mainaig iti nakaam-ames a pammaltog iti uneg ti pagadalan idiay Tacloban City.
Daytoy ti inrakurak ni Senador Risa Hontiveros.
Kuna na a ti Senate Committee on Women, Children, Family Relations, and Gender Equality, nga idaulwan na ti mangidaulo iti imbestigasyon, no sadinno nga agsentro daytoy iti insidente ken ti kumarkaro a pangta ti online radicalization kadagiti ubbing.
Inpetteng ni Hontiveros a masapol a maamoan no adda ti papel dagiti online platforms iti panagwaras ti nadadamsak nga ideya, ken agbalbalin nga umok dagiti grupo a mangmanmanipular ti panunot dagiti ubbing.
Maipalagip nga uppat nga indibidual ti pimmusay iti napasamak a pammaltog iti uneg ti pagadalan idiay Tacloban City ken naruay a sabsabali dagiti nasugatan.
Kabayatanna, inrakurak ti Philippine National Police a kitkitaen da ti posibilidad a ti narungsot a panagug-ugali dagiti dua a menor de edad a suspek iti pammaltog ket adda ti impluwensya ti online game a GoreBox.
