LAOAG CITY –Temporario nga ipaserra ti Cybercrime Investigation and Coordinating Center (CICC) ti panag-access iti online game a GoreBox kalpasan iti naladingit a pasamak iti San Jose National High School iti Tacloban City idi Lunes ti bigat, Hunio 22.
Basar iti Police Regional Office 8 (PRO-8), maysa kadagiti menor de edad a suspek iti nadakamat nga insidente ket maigarup nga agayayam ti nasao nga online game.
Innayonda pay a ti addang ket paset ti nalawlawa nga imbestigasion tapnu maamoan no adda ti direkta a koneksion ti nadakamat nga ayayam iti napasamak a pammaltog.
Kabayatanna, nakaituding met a mangikeddeng ti imbestigasion ti Senate Committee on Women, Children, Family Relations, and Gender Equality inton Hulio 1 mainaig iti nasao nga insidente ket talantanenda ti koneksion ti online platforms iti posible nga impluensia daytoy kadagiti ubbing.
