LAOAG CITY – Napadayawan ti Ilocos Norte kas kaunaan a probinsia iti intero a pagilian a nakabakuna iti 90 a porsiento dagiti ubbing a babbai nga agtawen ti siyam agingga iti sangapulo ket uppat iti Human Papillomavirus vaccine babaen iti “Ligtas sa Cervical Cancer: Para sa Bawat Babae at Mag-Ina Program”
Inyawat ti Department of Health babaen ken ni Regional Director Paula Paz M. Sydiongco ti certificate of recognition ken ni Gob. Cecilia Araneta Marcos.
Inbatad ti gobernador a ti nasao a pammadayaw mangipakita iti panagkaykaysa ti probinsya a mangipatungpal iti pagsayaatan dagiti umili aglalo iti benneg ti salun-at.
Nagyaman met ni Gob. Marcos ti Provincial Health Office, Rural Health Units, Municipal ken City Health Office pakairamanan ni Assistant Secretary Ana Carmela Ventura-Remigio ti Office of the Presidential Assistant for Northern Luzon.
Mainaig iti daytoy, ginutigot ti gobernador dagiti amin a Local Government Units ditoy probinsia a mangitultuloy a mangpatibker kadagiti programa iti benneg ti salun-at ken ti agtultuloy a pannakaitandudu dagiti preventive healthcare measures a mangpasayaat iti kalidad ti panagbiag dagiti Ilocano.
Inpasiguradona ti agtultuloy a suporta ti gobierno probinsyal kadagiti amin a ganuat a mangitandudu iti kinatalged ken pagsayaatan dagiti umili.
