LAOAG CITY – Nagtalinaed nga umun-una a transparent a pagilian iti Southeast Asia ti Pilipinas maipapan iti panaglukat ti impormasion mainaig iti nailian a pundo basar iti 2025 Open Budget Survey (OBS) ti International Budget Partnership.
Nakaala ti Pilipinas ti transparency score a 76 iti 100, apagapaman a nangatngato maidasig iti 75 idi 2023. Naartapan daytoy ti 61 a puntos a maibilang nga umdas tapno maipakita ti impormasion nga ipabpablaak ti gobierno mainaig iti pundo.
Nangatngato ti marka ti Pilipinas maidasig iti global average a 45 ken Asia-Pacific average a 49.
Naartapanna ti dadduma pay a pagilian iti Southeast Asia tulad ti Indonesia (71), Thailand (55), Cambodia (54), Vietnam (51) ken Malaysia (51).
Rukrukuden ti transparency component ti Open Budget Survey no mano a daras a makita ti publiko ti impormasion maipanggep iti panagkolektar ken panaggastos ti pundo ti gobierno.
Kitkitaen daytoy ti panagbalin nga available, napapanawen ken kumpleto ti walo a kangrunaan a budget documents.
