LAOAG CITY – Saan nga umanamong ti kampo ni dati a Presidente Rodrigo Duterte iti kiddaw ti prosekusion ti International Criminal Court a ma-accesss ti personal a ramitna ken i-freeze ti aniaman a kuarta a nakumpiskar kalpasan a naarestar daytoy ken agturong iti The Hague idi napalabas a tawen.
Segun iti depensa, saan a kasapulan nga i-freeze iti kuarta gapu ta adda daytoy iti kustodiar ti Registry ti ICC.
Kiniddaw pay ti kampo ni Duterte a saanda nga ipalubos a ma-access ti prosekusion dagiti nakumpiskar a tulbek ken nagduduma pay a personal a ramit gapu ta mabalin daytoy a panaglabsing ti privacy ken iti kabagyanna.
Nupay kasta, iti kampo ti Registry ti ICC, nakasagana daytoy a sumurot ti aniaman a bilin ti Trial Chamber III.
