LAOAG CITY – Mangnamnama ti House prosecution panel nga insigida a makaiprisentarda ti testigo iti umuna nga aldaw ti impeachment trial kontra ken ni Vice President Sara Duterte a naikeddeng inton Hulio 6.
Inbatad ni House prosecution panel legal spokesperson ken private prosecutor Benjamin “Jay” Tolosa Jr. a basar iti schedule ket maiwayat tunggal Lunes agingga Mierkoles ti presentation dagiti witnesses ken documentary evidence agingga a sakbay nga isayangkat ti State of the Nation Address wenno SONA ni Presidente Ferdinand Marcos Jr. inton Hulio 27.
Dinakamat ni Tolosa a kalpasan ti State of the Nation Address ket maiwayat ti panangusig tunggal Martes agingga Huebes.
Naammoan nga 62 ti trial days a kiniddaw ti prosekusion idinto a 30 nga aldaw met ti kiniddaw a trial days ti defense team ni Vice President Sara.
Nupay kasta, kuna ni Tolosa a mabalin daytoy nga agbalin nga al-alisto depende iti kapaspas ti pannakaiprisentar dagiti ebidensia.
