LAOAG CITY – Naipaayan ti libre a serbisio dagiti residente ditoy siudad ti Laoag iti babaen ti panagbinnulig ti Laoag City Government ken LGBTQ Community kas selebrasion ti Pride Month a naiyuswat iti Aurora Park.
Inbatad ni Mrs. Janet Retamal, ti Head ti POPCOM nga adda ti medical ken dental services, HIV Testing, panagrehistro para ti ALIKAKA card, legal services, pannakairehistro dagiti dingwen, deworming ken anti-rabies vaccine dagiti aso ken pusa , libre a pukis ken masahe.
Kunana a ti kangrunaan a gagem daytoy nga aktibidad ket ti pannakabigbig ti LGBTQ Community iti babaen ti pannakaipaayda ti serbisio iti publiko.
Innayonna pay a kanayon a mapaneknekan ti laing ken talent dagiti miembro ti LGBTQ iti nadumduma a benneg isu nga adu kadagitoy ti nagboluntario a mangipay kadagiti libre a serbisio para iti amin.
Kabayatanna, kunana pay a dakkel ti kontribusion ti LGBTQ Community iti siudad ken iti intero a pagilian.
