LAOAG CITY – Sumurok 10,000 a residente ti naibakwit kalpasan ti maysa a nalawa a wildfire iti abagatan ti France nga asideg iti border ti Spain basar kadagiti otoridad.
Agtultuloy a saan a makontrol dagiti otoridad ti uram iti agarup 4,600 nga ektaria ti kabanbantayan iti French Pyrenees.
Basar kadagiti opisial, addan ti 16 nga indibidual ti nasugatan pakairamanan ti uppat a bumbero.
Manamnama nga ad-adda pay nga agwaras ti apoy kadagiti sumaruno nga oras gapu iti nadagaang a panawen ken napigsa nga angin.
Nangipatuloden ti European Union ti uppat a water-bombing aircraft manipud iti Cyprus ken Sweden pakairamanan ti sumurok 100 a bumbero tapno tumulong kadagiti emergency response team iti ili ti Trevillach nga asideg iti siudad ti Perpignan.
Naapektaran met ti wildfire ti Tour de France no sadinno nga inserra iti publiko ti paset ti ruta tapno saan a maitantan ti operasion dagiti bumbero.
Inbatad ni European Commission President Ursula von der Leyen a makikaykaysa ti European Union idiay France iti panagsango ti didigra.
Segun kadagiti eksperto, ti nakaro a pudot a napasaran idiay France ken dadduma pay a pagilian iti Europa kadagiti naglabas a bulan ti nangitunda iti panagtikag kadagiti nalawa a daga isut gapuna nga al-alisto ti panagwaras ti wildfire.
Manamnama nga umabot manen iti 40 degrees Celsius ti temperatura iti abagatan a laud iti France ita a lawas kabayatan nga agtultuloy nga agwarwaras ti nakaro nga heatwave ti Spain ken Portugal.
