LAOAG CITY – Inpakaammo ni P/Maj. Adrian Agbannaoag, pannakangiwat ti Ilocos Norte Police Provincial Office nga adda dagiti nai-deploy a kapulisan iti aglawlaw ti Batac City Public Market kalpasan a nauram.
Inbatadna a daytoy ket tapno maipasigurado nga awan ti aggandat nga agala wenno agtakaw kadagiti kagamitan wenno produkto dagiti aglaklako iti tiendaan.
Inlawlawagna nga insigida a nangi-deploy-da ti kapulisan iti lugar tapno saan a gundawayan dagiti indibidual nga agaramid ti dakes a panggep kadagiti biktima ti uram.
Kunana a babaen iti naiget a panagbantayda iti nasao nga area a nakapasamakan ti uram ket awan ti nakita wenno natiliw ti kameng ti Philippine National Police.
Immuna iti daytoy, kuna ni Fire Senior Inspector Hendriech Gudoy, City Fire Marshal ti Bureau of Fire Protection iti siudad ti Batac a nangrugi ti uram iti dry goods section no sadinno a masarakan dagiti grocery, paglakoan ti bagas ken dagiti karinderia.
Maipalagip a naan-anay a nasebseban ti uram kalpasan ti sumurok siam nga oras a panangsebseb dagiti bumbero babaen kadagiti 27 a fire truck.
Iti agdama, agtultuloy ti imbestigasion dagiti otoridad iti namunganayan ti uram ken ti balor dagiti nadadael gapu iti insidente.
