LAOAG CITY – Sinungbatan ni Atty. Jason Perera dagiti maipagarup nga alegasion ti Philippine National Police (PNP) Laoag Chief Colonel Ryan Retotar kontra kenkuana.
Kunana nga adda ti kalinteganna a mangkuyog iti klientena bayat a manarimaan ti booking procedures no sadinno a daytoy pay ti nakaikabil iti Konstitusion a saanna a masisinuo no maipatpatungpal met laeng iti linteg wenno saan.
Mainaig iti daytoy, kunana pay a kayatna ti dumawat ti kopya ti CCTV a mai-release kuma idi napalabas a lawas ngem kuna ti PNP Laoag a biglaan a naperdi isu ti gapuna a saanda a makaited ti nasao a kopya.
Segun kenkuana ket dakkel kuma a mangpaneknek daytoy iti alegasion kontra kenkuana a pilitenna ti sumrek ken dakkel ti bosesna iti opisina no sadinno a no malagipna ket masansan laeng daytoy a mapan tapno agimbestigar ken bayabayen ti klientena kas maysa nga abogado ken mangidaulo ti Committee on Human Rights.
Kinunana a mabalin a kunaen ti PNP Laoag a napukaw ti kopya tapno saan a makita ken maisalakan ti umno a nagbasol.
Malaksid iti daytoy, indasar manen ni Perera iti nasao a problema iti napasamak a session da no sadinno a kunana a kasapulan ti pannakainstolar ti CCTV, body worn camera, ken dash cam iti police patrol car tapno ti kasta ket makita dagiti umno a pasamak.
Kunana nga adda kuma ti sabali pay a mang-monitor kadaytoy ta saan laeng a ti akin control ket dagiti mismo a kameng ti kapulisan.
Inbatad ni Perera a dakkel a makatulong daytoy saan laeng a tapno protehiran dagiti umili nudiket makita pay no adda dagiti saan a nasayaat nga ugali dagiti PNP iti pannakikoordinarda iti siasinno man.
Innayonna pay a no kaya ti siudad mangapbropar iti P20M a balor ti maysa nga sports event ket kasapulan a kaya da met ti aginstolar iti nasao a CCTV tapno masuportaran ken mapapigsa ti kameng dagiti kapulisan.
