LAOAG CITY – Natukkol ti saka ti maysa nga estudiante kalpasan a nadungpar ti maysa a motorsiklo iti Barangay Buttong ditoy siudad ti Laoag.
Naamoan a ti motorsiklo ket nagluganan dagiti dua nga estudiante nga agturong iti Mariano Marcos State University, idinto a ti nadungpar ket maysa a babai nga estudiante met iti Nortwestern University iti siudad ti Laoag.
Basar kadagiti nakaimatang iti insidente, dagitoy estudiante a nakamotorsiklo ket agturong iti agpaabagatan a direksion a mapan iti siudad ti Batac nga agilakad ti scholarship program ket bayat iti panagmaneho ti driver ket kellaat a limmabas ti babai a nangitunda ti pannakaidungparna iti motorsiklo.
Mainaiag iti daytoy, nagsagaba met ti sugat iti nagduduma a paset ti bagi dagiti dua a nakamotorsiklo nangruna iti saka ken abaga dagiti nadakamat nga estudiante ken idinto a sagsagabaen met ti limmasat a babai ti sakit ti natukkol a sakana.
Iti baet daytoy, insigida a nagresponde dagiti kameng ti kapulisan ken ti Department of Public Safety no sadinno ket narigatanda a nangikabil ti biktima iti stretcher ta segun iti limmasat a biktima ket nasakit ti sakana gapo iti pannakaidungparna.
Basar iti pannakisarsarita dagiti otoridad iti babai ket agtawen daytoy ti 19, Political Science Student iti Northwestern University ken gapo ti nakaro a sinagabana ket saannan a kinabaelan ti nangipaay ti naananay a detalye ken kinunana a saan na a malagip ti napasamak gapo ti kinapaspas ti insidente.
Iti sabali met a bangir, inbatad met dagiti estudiante ti Mariano Marcos State University a nagkalubbon ti matorsiklo ket kellaat a limmabas ti nadakamat a babai.
Kabayatanna, naamoan nga awan ti pedestrian lane iti naglasatan ti nadakanat nga indibidual ken basar kadagiti nakaimatang iti insidete ket napaspas ti panagpataray dagiti nakamotorsiklo.
