LAOAG CITY – Nangipaay ni Atty. Carlos Isagani Zarate iti kapanunotanna mainaig iti umuna a tallo nga aldaw ti Impeachment Trial ni Vice President Sara Duterte.
Patienni Atty. Zarate nga adadda a nagpokus dagitoy iti technical issues.
Segun kenkuana, nasken kuma a contextual ti inikkanda ti pokus kangrunaan ti defense counsel team ti Bise Presidente gapu ta posible nga awanen ti makitada a pangiabotan gapu ta ti video ti panangpangta ni Vice President Sara Duterte ket nalawag a pangta iti biag ni Presidente Ferdinand Marcos Jr., First Lady Liza Marcos, ken dati a House Speaker Martin Romualdez.
Kunana a napigsa nga ebidensia daytoy iti impeachment trial gapu ta uray nalawag a naggapu a mismo ti Bise Presidente daytoy.
Inlawlawagna a masapul a ti sumaruno nga aldaw ket agpokusda iti napatpateg nga isiyu kas kuma iti umno a napasamak kadagiti confidential funds wenno hidden wealth no sadinno a billion ti simrek a kwarta ti Bise Presidente ken iti sobre a naited kadagiti opisiales ti Department of Education (DepEd).
Mainaig iti daytoy, kunana a saan a rumbeng a ti pagpokusan da ket ti technicalities kas kuma no photocopy ket maibilang kas ebidensia.
Innayonna pay a saan a nasayaat a mangmangeg dagiti agtutubo iti kastoy nga aramid ti Bise Presidente gapu ta dakkel ti epektona daytoy gapu ta nalawag a betrayal of public trusts.
Kabayatanna, namnamaenna a naiget ti pannakaisagana dagiti dokumento a maidasar ken namnamaenna a mapaalisto ti proseso ken maresolbar ti taray ti Impeachment Trial.
