LAOAG CITY – Agakem ni Judy Ann Santos kas ti pimmusay a Superstar ken National Artist for Film and Broadcast Arts a ni Nora Aunor iti umas-asideg a biographical film a “Bernal,” nga insurat ti National Artist for Film and Broadcast Arts a ni Ricky Lee.
Basar iti impormasion, agakem met ni Jericho Rosales iti karakter ti National Artist for Cinema a ni Ishmael Bernal, maysa kadagiti nalatak a direktor iti pakasaritaan ti pelikula a Pilipino.
Karaman iti pelikula da Iza Calzado, Atom Araullo, Rita Gomez ken John Lapus kadagiti saan pay nga inrakurak nga agbalin a papel dagitoy.
Inbatad ni Ricky Lee ti gagarna iti panangipatungpal ti proyekto a nabayagen a planplanoenna.
Maipalagip a nagbalin a nasinged a kadua ni Lee ni Bernal kadagiti sumagmamano a pelikula a Pilipino pakairamanan ti “Himala,” “Manila by Night,” ken “Relasyon.”
Manamnama a saludaran ti “Bernal” ti biag, obra ken ambag ti mabigbigbig a National Artist iti industria ti pelikula a Pilipino.
