LAOAG CITY – Naiparuk-at ti lima milyon a pisos manipud iti Quick Response Fund ti lokal a gobierno iti siudad ti Batac para kadagiti stall owners a naapektaran ti uram iti Batac City Public Market.
Segun ken ni Mayor Markee Chua iti siudad ti Batac, kaadoan kadagiti biktima ket nakaawat ti 100 ribu a pisos idinto a 10 ribu a pisos ti kababaan a financial assistance ti naipaay kadakuada.
Inpasingkedna nga amin a donasion manipud kadagiti opisial ti gobierno, pribado nga indibidual, organisasion ken dadduma pay ket maited kadagiti nagbalin a biktima ti uram.
Inlawlawagna nga umabot iti sumurok-kumurang 300 nga stall owners ti mabenepisiaran babaen iti Assistance to Individuals in Crisis Situation ken Sustainable Livelihood Program.
Kunana a dakkel a tulong dagiti nasao a programa para kadagiti biktima ti uram tapno in-inot dagitoy a makabangon kalpasan ti napasamak nga insidente.
Maipalagip nga inpakaammo ni Fire Superintendent Roxanne Parado, Provincial Fire Marshal a nangrugi ti uram kadagiti wirings ti kuryente ken mapatta-patta nga umabot iti 129 milyon a pisos ti balor dagiti nadadael a goods, appliances ken valuable items dagiti store owners idinto nga agarup 161 milyon a pisos met ti balor dagiti pasdek a nadadael.
Immuna iti daytoy, naideklarar nga state of calamity iti siudad ti Batac kalpasan a nauram ti tiendaan.
