LAOAG CITY – Indaulwan ni Presidente Ferdinand Marcos Jr. ti maysa a cabinet meeting no sadinno nga inaprubaran ti Gabinete na ti nailungalong a 2027 National Expenditure Program nga inpila ti Department of Budget and Management (DBM).
Segun ken ni Presidential Communications Office (PCO) Secretary Dave Gomez, natratar ken inaprubaran iti taripnong ti national budget para iti 2027.
Saan paylaeng a naipublikar ti pakabuklan ti pondo ken dadduma pay a detalye ti nailungalong a budget tapno saan a maunnaan ti pormal a panangisumitir ti presidente iti kongreso.
Saan met a nangipaay ti dadduma pay a detalye ni Sec. Gomez no ania pay ti trinatar da iti naisayangkat a Cabinet meeting iti Palasyo ti Malakanyang.
Naikeddeng nga isumitir ti presidente iti kongreso ti National Expenditure Program intono Agosto 14, 2026, dua lawas kalpasan ti State of the Nation Address na intono Hulyo 27.
Adda iti P6.793-trilyon ti national budget para iti fiscal year 2026.
Nangatngato daytoy ti sumuruk-kumurang a P467 bilyon wenno 7.4 porsiyento no ikumpara iti P6.326-trilyon a pondo idi 2025.
