LAOAG CITY –Inanunsio ti Revolutionary Guards ti Iran a temporarioda nga iserra ti Strait of Hormuz agingga iti sumaruno manen nga abiso kalpasan a nagpaputokda ti warning shots ken pagsardengen dagiti barko a maipagarup a dimmalyasat iti saan nga otorisado a ruta.
Basar iti Iran, awan pay ti barko a mapalubosan a dumalyasat iti Strait of Hormuz agingga nga agtultuloy ti pannakibiang ti Estados Unidos iti rehiyon. Nagballaag met ti Revolutionary Guards a puntiryaenda ti nagduduma pay a base ti kalaban no adda ti baro a panagatake kenkuada.
Agtultuloy met ti panangipetteng ti Iran nga adda ti karrebenganda a kontrolen ti pagdaliasatan dagiti barko iti nasao a ruta bayat a kidkiddawen ti Estados Unidos ti nawaya a panagdaliasat dagiti barko.
