LAOAG CITY – Pinilaan ti Office of the Ombudsman ti kaso nga usurpation of official functions ni dati nga Overseas Workers Welfare Administration Administrator Arnell Ignacio mainaig iti panaggatang ti ahensya ti ₱1.4-bilyon a balor ti sanikua.
Basar iti Department of Migrant Workers (DMW), maipagarop a pinirmaan ni Ignacio ti kontrata ti panaggatang ken inaprubaran na ti pannakaiparuk-at ti pondo uray awan ti pammalubos manipod iti Overseas Workers Welfare Administration Board of Trustees.
Inbatad ni Department of Migrant Workers Secretary Hans Cacdac nga inbilin ti Ombudsman nga agpila ti kaso kontra ken ni Ignacio.
Ti usurpation of official functions ket addaan ti pannusa nga innem a bolan agingga iti uppat a tawen a pannakabalud, depende iti desisyon ti korte.
Kabayatanna, inbasura ti Ombudsman dagiti reklamo a graft, malversation, ken plunder kontra ken ni Ignacio ken dadduma pay a karaman.
Gapu iti daytoy, agpila ti Department of Migrant Workers ti Motion for Reconsideration tapno balbaliw a tingitingen dagiti ebidensya.
