LAOAG CITY – Inkalintegan ni Senator-Judge Alan Peter Cayetano ni Davao City Mayor Sebastian “Baste” Duterte kontra kadagiti alegasyon a mabalin nga adda ti pakainaigan iti maaw-awagan nga “Operation Romanov.”
Inaramid daytoy ni Cayetano kalpasan a nangipaay ti baro a rakurak ni NBI Regional Director Atty. Jeremy Lotoc iti maikalima nga aldaw ti impeachment trial ni Vice President Sara Duterte.
Iti panagsaludsud da Senator-Judges Raffy Tulfo ken Panfilo “Ping” Lacson, inbatad ni Lotoc a ti maipagarop a target ti pangta ket saan a ni VP Sara, no di ket ni Presidente Ferdinand Marcos Jr. ken ti pamilya na.
Segun ken ni Lotoc, mipagarop a nakita dagiti imbestigador ti NBI ti maysa nga statement ni Mayor Baste Duterte iti maysa a rally idi Enero no sadinno a dinakamat na ti nagbanagan ti Romanov family ti Russia kas ballaag ken ni Presidente Marcos.
Ti Romanov family ti naudi a dinastiya dagiti tsar iti Russia a napapatay idi 1917 kalpasan ti Bolshevik revolution.
Nupay kasta, kuna ni Cayetano a saan a rumbeng nga ikonsiderar a dagus a pangta ti rakurak ni Mayor Duterte, no sadinno nga inpetteng na nga adda ti pagdumaan ti maysa a ballaah ken maysa a nabatad a panagpangta.
