LAOAG CITY – Dimmapo ti sumurok 100 a pagtaengan gapu iti dakkel nga uram idiay Drammen, Norway basar kadagiti rescue official.
Binalkot ti napuskol a nangisit nga asok ti lugar nga adda iti sumurok-kumurang 50 a kilometro ti kabisera nga Oslo.
Iti baet ti kinalawa ti uram, awan ti nairekord a pimmusay wenno mapukpukaw a residente.
Adda ti sumurok 60 a bumbero ti naiwaras tapno masebseban ti apoy ken adda pay ti helikopter a nangibuyat ti danum manipud iti tangatang tapno malappedan ti panagwaras ti apoy.
Naammoan a gapu iti napigsa nga angin, alisto a nagramram ti apoy ken umabot pay iti kaparanget a kabanbantayan isut gapuna nga inbakwit dagiti otoridad ti ginasgasut a residente.
Agtultuloy nga im-imbestigaran dagiti otoridad ti namunganayan ti uram kabayatan a maiwaywayat ti assessment iti kalawa ti nadadael.
