LAOAG CITY – Inbatad ti Malakanyang a seryoso dagiti pangta iti biag ni Presidente Ferdinand Marcos Jr. kalpasan a nadakamat manen dagiti rakurak da Davao City Mayor Sebastian “Baste” Duterte ken Vice President Sara Duterte iti impeachment trial.
Segun kenni Palace Press Officer, Usec. Claire Castro, saanen a baro iti presidente dagiti nasao a pangta ken ammo na nga aggapo dagitoy kadagiti kalaban na iti pulitika aglalo kadagiti Duterte.
Inpaganetget ni Castro nga obligasyon dagiti maseknan nga ahensya ti gobierno a siguradwen ti president ken mangisayangkat ti naiget nga imbestigasyon.
Inpetteng pay ni Castro a saan a rumbeng nga ibilang nga angaw ti isyu gapu ta biag ti president ti nakataya iti daytoy.
Innayon ni Castro a gapu kadagiti pangta iti biag ti chief executive, nabayagen nga adda ti maipatpatungpal a naiget a seguridad para iti president.
Inkalintegan ni Castro nga aniaman ti lebel ti proteksyon a kasapulan ni Presidente Marcos Jr. ket masapol nga ipaay dagiti maseknan nga ahensya ti gobierno ken no kasapulan a paigetan pay dagiti seguridad gapu kadagiti mangmangngeg ken makitkita a pangta, rumbeng laeng nga aramiden dagitoy tapno masigurado ti kinatalged ti kangatoan nga opisyal ti Pilipinas.
