LAOAG CITY – Kiniddaw ti Department of Migrant Workers (DMW) iti Office of the Ombudsman a balbaliw a tingitingen a naimbag ti desisyon na mainaig iti graft complaints kontra ken ni dati nga OWWA Administrator Arnell Ignacio.
Daytoy ket kalpasan a kinasoan iti Ombudsman ni Ignacio ti usurpation of official functions wenno nagaramid iti banag nga awan ti pammalubos mainaig iti maysa a maipagarop a maanomalya a panaggatang ti sanikua nga agbalor ti P1.4 billion.
Nupay kasta, inbasura ti Ombudsman dagiti kaso a plunder kontra ken ni Ignacio, rason a nangisumitir ti DMW ti motion for reconsideration idi Hulyo 17.
Segun iti DMW, adda ti pagsungsungbatan ni Ignacio, dagiti sumagmamano nga opisyal ti OWWA, ken dagiti pribado a naglako ti sanikua gapu ta intuloy da ti transaksyon nga awan ti pammalubos ti OWWA Board of Trustees.
Ti nasao a sanikua ket mapagbalin koma a temporaryo a pagnaedan wenno halfway house para kadagiti overseas Filipino workers (OFWs) nga agawid gapu iti emergency.
Inpetteng ti DMW a nangatngato iti agarop P198 million ti presyo ti nagatang a sanikua no ikumpara iti appraisal ti Land Bank of the Philippines, a maipagarop a nangitunda ti direkta a perdisyon iti gobierno.
Segun pay iti DMW, maipagarop a naaddaan ti alisto a proseso iti panagbayad ken napukaw ti 51 condominium units a binayadan ti gobyerno.
Inbatad ni DMW Secretary Hans Leo Cacdac a mapatta-patta a P97 million ti pondo ti umili a mabalin a nasayang gapu iti nasao a transaksyon.
