LAOAG CITY – Inikkat iti puesto ni International Criminal Court (ICC) Prosecutor Karim Khan kalpasan a nagdesision ti kaadoan kadagiti miembro a pagilian ti korte a pabor iti pannakadisina.
Basar iti report, 82 iti 125 a miembro nga estado ti International Criminal Court ti simmuporta iti desision kagiddan dagiti alegasion ti sexual misconduct nga adda ti pakainaiganna iti maysa a junior staff member ti korte.
Naiget a naglikudan ni Khan dagiti pammabasol no sadinno a basar iti abugadona ket awan ti umdas nga ebidensia ti maiyak-akusar kontra kenkuana ken saan a nagbalin a patas ti nagbalin a proseso ti panagdengngeg iti kaso.
Kalpasan ti pannakaikkatna, mangrugi ti proseso ti panagpili ti baro nga International Criminal Court prosecutor.
Nupay kasta, manamnama nga inton sumaruno a tawen pay laeng a maaddaan ti kasukat ni Khan.
Mainaig iti daytoy, nagtalinaed a maipatpatungpal ti amin a manarimaan nga arrest warrants nga inparuk-at ti International Criminal Court gapu ta dagiti laeng hues ti korte ti addaan ti bileg nga ibabawi dagitoy.
Kabayatanna, inpetteng manen ti Estados Unidos ti panangkontrana iti International Criminal Court.
Iti panagbisita iti Pilipinas ni United States Secretary of State Marco Rubio, kunana a saan a pulos a sumango iti panangusig iti International Criminal Court dagiti opisial ti Estados Unidos.
Saan pay a miembro ti Estados Unidos iti International Criminal Court ken nabayagen a kukwestionaranna ti bileg ti nasao nga International Court.
