LAOAG CITY – Kiniddaw ni House impeachment adviser at prosecution spokesperson Robert Ace Barbers ken ni Senador Pia Cayetano ken Senador Alan Peter Cayetano nga ilawlawag iti publiko ti kinapudno mainaig ti maipagarup nga agwarwaras a video ti impeachment trial ni Vice President Sara Duterte.
Segun ken ni Barbers, adda dagiti dua a senador iti panagdengngeg isu nga ammo da ti agpayso a napasamak ken mabalin a maikorehirda ti naglaon ti video a kunana a saan a mangipakita ti sibubukel a konteksto ti oral arguments.
Daytoy a rakurak ni Barbers ket sungbat iti Facebook reels nga inburay ni Senator Pia Cayetano a naglaon iti na-edit a paset ti panagdengngeg, pakairamanan ti panagsinnungbat ni Senator Alan Peter Cayetano ken House prosecutor Akbayan Rep. Cehl Diokno.
Kuna ni Barbers a napateg a maipakita ti pakabuklan ti video ti impeachment proceddings tapno makabukel ti patas ken umno a panangawat imbes a mangnamnama da laeng iti bassit a video clips iti social media.
Ginutigotna pay dagiti umili a padaanan ti sibubukel nga impeachment trial tapno maliklikan ti pannakaiwaras ti palso a damag ken agtalinaed ti talek ti publiko iti proseso ti impeachment.
