LAOAG CITY – Namnamaen nga idasar ni Presidente Ferdinand Marcos Jr. dagiti naaramid ti administrasyon na iti napalabas a tawen ken dagiti prayoridad a linteg iti maikalima nga State of the Nation Address (SONA) intono bigat, Hulyo 27.
Segun iti Malacañang, agserbi a report iti umili ti State of the Nation Address maipanggep kadagiti naaramid ti gobierno ken dagiti gakat a kalikagom nga ilungalong ti administrasyon na kadwa na ti kongreso iti nabatbati a dua a tawen ti termino na.
Inbatad ni Presidential Communications Office (PCO) Secretary Dave Gomez a naipagagangay nga idasar iti State of the Nation Address dagiti nagballigian ti administrasyon ken ti legislative agenda na.
Kuna ni Gomez, mismo a ni Presidente Marcos ti nagsurat ti ireport na usar dagiti report manipod kadagiti ahensya ti gobierno ken agtultuloy ti panangurnus na agingga iti maudi a minuto sakbay ti panagbitla na.
Innayon na a gagem ti State of the Nation Address nga ipakaammo iti publiko dagiti naaramidan ti gobierno ken no kasanu a sinango na ti nagduduma a karit iti ekonomiya.
Saan a kinumpirmaran ti Malacañang no trataren ni Presidente Marcos Jr. ti isyu ti maipagarop nga anomalya iti flood control projects ken ti impeachment trial ni Vice President Sara Duterte.
Kabayatanna, inbilin ni Executive Secretary Ralph Recto kadagiti ahensya ti gobyerno a papigsaen ti seguridad, traffic management, crowd control, ken emergency response tapno masigurado ti naurnus ken natalinaay a pannakaisayangkat ti State of the Nation Address.
