LAOAG CITY – Umabot iti 51 a tattao ti naarestar iti kangitingitan dagiti naisayangkat a rally sakbay pay ti State of the Nation Address (SONA) ni Presidente Ferdinand Marcos Jr. idi kalman, aldaw ti Lunes, Hulyo 27.
Daytoy ti inbatad ni Philippine National Police (PNP) chief General Jose Melencio Nartatez Jr.
Nagtalinaed ti takder ni Nartatez nga adda ti pagibasaran da para iti “valid arrest” gapu iti panaglabsing dagitoy kadagiti lokal nga ordinansa.
Basar iti heneral, karaman kadagiti nalabsig da ket ti Republic Act 9003 wenno Ecological Solid Waste Management Act of 2000, Batas Pambansa 880 wenno Public Assembly Act of 1985, ken ti panagsuot ti “balaclava” wenno panangabbong ti rupa.
Innayon ti PNP chief a kalikagom dagiti otoridad a malapdan ti panangriribok iti kalsada ken maapektaran ti natalna a protesta.
