LAOAG CITY – Nakaaramid ti pakasaritaan ti maysa a baro idiay Estados Unidos kalpasan a nagbalin daytoy a college professor iti tawenna nga 18.
Ni Nathan Thomas ket agtawen iti 18 years and 346 days idi mangrugi daytoy a mangisuro ti computer programming idiay Miami Dade College idi Agosto 2023.
Mangisuro daytoy ti kurso a “C for Engineers” kadagiti estudiante nga arig kasadagna.
Gapu iti daytoy, binigbig ni Thomas ti Guiness World Records kas “youngest professor” iti sangalubongan.
Naartapanna ti dati a rekord ni Colin Maclaurin a nagbalin kas propesor iti tawen a 19 idi tawen 1717 ken naub-ubing daytoy ngem ni Alia Sabur a dati a kaubingan a babai a propesor nga agtawen ti 18 years and 362 days.
Ubing pay laeng ni Nathan ket inpakitanan ti laingna nga agbasa. Idi agtawen ti 10 ket nakastrek daytoy iti kolehio ken sakbay nga agtawen ti 19 ket nakaturpos daytoyen ti bachelor’s ken master’s iti Electrical Engineering iti Florida International University.
Iti agdama, agad-adal ni Nathan ti law iti University of Miami kagiddan ti panagisurona iti online.
Segun ken ni Nathan, saan a nagbalin nga isyu ti tawenna ti panagisurona.
Kunana nga agpapada ti gagem ti amin iti klase, daytoy ket ti masursuro.
Kabayatanna, kas dagiti dadduma nga agtubtubo, hilig met ni Nathan ti sports ken music.
