LAOAG CITY – Inpetteng ni Palace Press Officer, Undersecretary Claire Castro a ti panangilawlawag ni Vice President Sara Duterte nga awan ti riri da ken ni Presidente Ferdinand Marcos Jr. ken awan ti personal a problema na iti daytoy ket pammaneknek a saan a nakapasar ti dakes a pannakatrato manipod iti presidente, uray kas maysa a tao wenno Bise Presidente.
Segun ken ni Castro, iti baet dagiti pammabalaw nga ibatbato ti bise presidente iti administrasyon, saan a personal nga inatake ni Presidente Marcos Jr. ti Bise Presidente.
Nupay kasta, kinontra ni Castro iti maipagarop a nagbalin a rakurak ni Vice President Duterte kontra iti presidente ken dagiti alegasyon na nga awan ti maar-aramidan ti administrasyon.
Inpetteng ni Castro nga adda dagiti konkreto a programa ken proyekto nga ipatpatungpal ti gobierno.
Innayon na nga uray ni dati a Bise Presidente Leni Robredo ket binigbig na ti sumagmamano a programa ti gobyerno.
Ginutigot met ni Castro ti publiko nga agbalin a naannad kadagiti impormasyon ken liklikan ti agiwaras ti saan nga usto nga impormasyon ken damag.
