LAOAG CITY – Maysa a barito iti Estados Unidos ti nakaaramid ti pakasaritaan kalpasan nga agbalin daytoy a college professor iti tawen a 18, no sadinno a ti kaadoan ket mangrugi pay laeng iti kolehiyo.
Ni Nathan Thomas ket 346 nga aldaw manipud idi mangisuro daytoy ti computer programming iti Miami Dade College idi Agosto 2023. Nangisuro daytoy ti kurso a ‘C for Engineers’ kadagiti estudiante nga arigna a kapadana ti edad.
Gapu iti daytoy, nabigbig daytoy ti Guinness World Records kas “youngest professor” iti intero a lubong. Naartapanna ti dati a rekord ni Colin Maclaurin a nagbalin a propesor iti tawen a 19 idi 1717. Naub-ubing pay daytoy ngem ni Alia Sabur a kaubingan a babae a professor iti tawen a 18.
Kuna ni Nathan a saan a nakalapped ti tawenna tapno mangisuro daytoy. Iti tawen a 10, nakastreken daytoy iti kolehiyo. Iti edad a 14, nalpasna ti bachelor’s ken master’s degree iti Electrical Engineering.
Iti baet ti panagballigina, agbibiag daytoy kas iti dadduma met laeng nga agtutubo a mahilig iti sports ken musika. Kunana iti amin a saan nga ikumparar ti bagbagi iti dadduma ken agtultuloy latta iti panagpadur-as ti bagbagi.
