LAOAG CITY – Inpetteng ni Senador Loren Legarda a saan a pudno ken awan ti pagibasaran ti alegasion ti Office of the Ombudsman mainaig iti maanomalya a P10 billion solar contracts kontra kenkuana ken ti anakna a ni Batangas Rep. Leandro Leviste.
Daytoy ket kagiddan ti rakurak ni Ombudsman Jesus Crispin Remulla nga umaboten iti preliminary investigation ken isagsaganan ti maipila a kaso a plunder ken graft kontra iti agina.
Inbatad ni Legarda nga awan pay ti naawatda nga aniaman a komunikasion manipud iti Office of the Ombudsman mainaig kadagiti akusasion.
Nupay kasta, inpasingked ti Senadora a saan a pudno ken awan ti pagibasaran dagiti alegasion ken awan ti pundo ti gobierno a karaman iti isyu.
Nakasagana ni Legarda nga ibutaktak ti kinapudno maipanggep iti maibatbato nga isyu ti ghost electricity project.
Immapela ni Legarda iti publiko nga agbalin a naridam ken kitaen ti panawen ken konteskto iti likud ti panangiparuk-at dagitoy nga alegasion.
