LAOAG CITY – Inpaganetget ti Malacañang a seryoso ti gobierno iti kampania kontra iti amin a klase ti krimen kagiddan ti rakurak ni Vice President Sara Duterte a maipagarup a mabalin nga agbayad ti gunman iti balor a ₱5,000 tapno patayen ti maysa a tao.
Inbatad ni Palace Press Officer Undersecretary Claire Castro no adda ti ammo ti Bise Presidente mainaig iti kastoy nga iligal nga aramid ket nasken nga ipakaammona daytoy kadagiti otoridad tapno makatulong iti imbestigasion.
Inlawlawagna kas maysa a nangato nga opisial ti gobierno ket rumbeng nga idauloan ni Vice President Sara iti pananglaban iti krimen ken saan a mangipaay ti rakurak nga arig a mangipaay ti ideya mainaig iti panagbayad ti assassin.
Innayonna a no pudno daytoy a tignay, apay saan daytoy a naikkan ti importansia aglalo nabayagen nga adda iti gobierno ti Bise Presidente ken nagbalin met a Presidente ti amana.
