LAOAG CITY –Inbatad ni dati a Commission on Audit Intelligence and Confidential Funds Office State Auditor Atty. Roderick Wamil a saan a nangisubmitir ti Department of Education iti aniaman a mangsuporta a dokumento para iti mapapati a panangusarna iti P112.5 milion a confidential funds idi 2023.
Iti maika-12 nga aldaw ti impeachment trial ni Bise Presidente Sara Duterte, naipakita ken ni Wamil ti 2023 physical and financial plan ti DepEd, a nangilatang iti P37.5 milion ti tunggal maysa para iti umuna agingga iti maikatlo a kuarter ti tawen. Pinasingkedanna a pinirmaan ken inaprobaran ni Duterte a dati a Secretary on Education idi ti dokumento.
Ti plano ket mangilatang iti P27.875 milion para kadagiti counter-insurgency programs, P30.2 milion para iti pananglapped ken panangkontrol iti abuso iti uneg dagiti pagadalan, P27.24 milion para kadagiti operasion kontra illegal nga aktibidad, ken P27.185 milion para kadagiti programa kontra iti ekstremismo ken terorismo.
Idi sinaludsod ni House private prosecutor a ni Atty. Lorna Kapunan no nangisubmitir ti DepEd kadagiti dokumento tapno mapaneknekan ti gastos para kadagiti nadakamat a programa, kuna ni Wamil a saan dagitoy a nagisubmitir.
Saan met kano nga inbaga ti ahensia dagiti espesipiko a kompidensial nga aktibidad a nakagastosan ti pondo.
Sinaludsod pay ni Kapunan no nangisubmitir ti DepEd iti listaan dagiti kameng ti New People’s Army, communist ken leftist groups, wenno pammaneknek a nakissayan ti panagrekrut dagiti mangisursuro ken estudiante iti babaen kadagiti grupo a komunista, a naibagbaga a pisikal a puntiria dagiti sa counter-insurgency programs.
Nagserbi ni Duterte kas sekretario ti DepEd manipud Hunio 2022 agingga iti panagikkatna idi Hulio 2024.
