LAOAG CITY – Saan nga inraman ti Office of the Vice President (OVP) ti aniaman nga opisial a resibo wenno OR iti liquidation report a naisubmitir iti Commission on Audit (COA) mainaig iti pannakausar ti P125 million confidential funds manipud Disiembre 21 agingga 31, 2022.
Kinuna ni COA Auditor Roderick Wamil, ti witness ti Commission on Audit a daytoy ti umuna a gundaway a ti maysa nga ahensia ket nangisubmitir laeng kadagiti acknowledgment receipts (AR) iti liquidation report-na.
Nupay kasta, saan a masinunuo ni Wamil no daytoy ket standard practice gapu ta dagitoy laeng ti ahensia a nangisubmitir laeng ti AR kenkuana.
Segun kenni Wamil, dagiti ahensia nga agus-usar ti confidential ken intelligence funds ket masapul nga agisubmitir kadagiti supporting documents kas kadagiti OR wenno sales invoices nga agserbi kas pagibsaran ti nailatang a pondo.
Idi sinaludsod ni Senador-judge Kiko Pangilinan no kasapulan wenno obligado dagiti ahensia ti gobierno nga addaan iti confidential intelligence funds a mangisubmitir iti OR wenno sales invoices, sinungbatan ni Wamil a kasapulan daytoy.
Kinunana a no naisubmitir dagiti official receipts wenno sales invoices ket mapaneknekan koma ti COA no pudno ti naibaga iti liquidation report ti confidential funds ti OVP.
