LAOAG CITY – Linukatan ti Benguet ti uppat a gate ti Ambuklao Dam ken Binga Dam iti Benguet tapno maparuk-atan ti danum gapu ti agtultuloy a napigsa a tudo.
Segun iti PAGASA, agarup alas-8 ti bigat, nalukatan dagiti uppat a gate ti Ambuklao Dam iti kangato a 2.0 metro, a nakairuar ti 281.20 cubic meters per second (cms) a danum.
Naluktan met dagiti uppat a gate ti Binga Dam iti kangato a 2.0 metro, a nangiruar iti 317.53 cms a danum.
Mainaig iti daytoy, agtultuloy ti panangapektar ti Southwest Monsoon iti Luzon ken Visayas. Manamnama ti panagtudo ti monsoon iti Occidental Mindoro, Zambales, ken Bataan, idinto a sagpaminsan ti panagtudo ti Metro Manila, Ilocos Region, Abra, Benguet, Tarlac, Pampanga, Bulacan, Rizal, Cavite, Laguna, Batangas, Oriental Mindoro, ken Antique.
