LAOAG CITY – Inbatad ni House Prosecution Spokesperson ken Lanao del Sur Rep. Zia Alonto Adiong a posible a nausar kadagiti aktibidad ti pannakaipapigsa ti political plans ni Vice President Sara Duterte dagiti confidential funds-na.
Inrakurak ni Adiong ti alegasion kalpasan ti nagbalin a testimonia iti Senate impeachment Court ni Commission on Audit (COA) state auditor Xylene Del Campo a nangdakamat ti confidential funds ti Office of the Vice President (OVP) para kadagiti Christmas activities, Knights of Rizal, Thanksgiving and coordination meeting, tree planting, gift giving ken medical missions.
Mainaig iti daytoy, inpetteng ni Adiong a nakasidsiddaaw ti timing dagiti naisayangkat nga aktibidad manipud Disiembre 13 agingga 18, 2022 uray man pay a ti cash advance ti OVP ket para laeng kadagiti aldaw ti Disiembre 21 agingga 31.
Malaksid iti daytoy, innayon pay ni Alonto a nasken a matingiting dagiti isyu iti Acknowledgment Recipts (AR) ti OVP a nagkurang kadagiti supporting documents.
Maipalagip nga immunan a nangiparuk-at ti Commission on Audit (COA) ti dua a Notice of Disallowance mainaig iti panagusar ti OVP ti confidential funds gapu iti kinakurang dagiti maiprisintarda a dokumento ken ti panaglabsingda iti Joint Circular.
