LAOAG CITY – Ilunglungalong ni Senador Erwin Tulfo ti 20% discount iti mobile prepaid load, mobile postpaid plans, ken mobile internet packages para kadagiti amin nga estudiante a Pilipino iti baet ti agtultuloy a pannakasuspenso ti face-to-face classes gapu iti dakes a panawen.
Ti Senate Bill No. 2275 wenno ti “Student Load Discount Act,” ket gagem na ti mangkissay iti pinansial a bakbaklayen dagiti pamilia a makisabsabay a mangsurot kadagiti demand ti moderno nga edukasion.
Iti babaen ti nasao a gakat, karaman ti diskuento ti amin nga umili a Pilipino nga agdama a nakaenrol kadagiti otorisado a publiko ken pribado a pagadalan iti elementaria, sekondaria, technical-vocational, higher education, malaksid iti post-graduate studies. Ti mandatory 20% discount ket magun-od iti intero a tawen, agraman dagiti ngudo ti lawas ken bakasion, tapno masigurado ti agtultuloy a panagsursuro.
Tapno ma-avail ti discount, kasapulan laeng nga idatag dagiti estudiante ti school ID-da wenno pammaneknek ti enrollment, agraman ti birth certificate tapno mapaneknekan ti kinaumilida a Filipino.
Kalikaguman met ti linteg nga ipatungpal dagiti kompania ti telekomunikasion ti diskuento kadagiti amin a sakop a serbisio, ken dagiti aglabsing ket maipaayan ti nadagsen a pannusa.
