LAOAG CITY – Umab-abot iti 84 a tonelada ti basura ti makolkolektar ditoy ciudad ti Laoag iti tunggal aldaw, ken possible nga umabot pay iti 100 a tonelada iti kada aldaw no mainayon dagiti saan a makolkoletar.
Segun kenni Mayor James Bryan Alcid, nakapokus ti garbage collection iti panangala kadagiti na-segregate a basura, kas naipalaon iti Republic Act 9003 wenno Ecological Solid Waste Management Act.
Inbatad na nga agtultuloy ti panangpapigsa ti ciudad ti Laoag iti sistema ti panagkolektar ken panangimanihir iti basura, agraman ti panangipatungpal iti waste segregation.
Nagpanawagan ni Mayor Alcid kadagiti umili ditoy siudad iti panagbalin a nadisiplina iti pannakapagsisina ken panangurnus a naimbag ti basura.
Ipangpangruna ti ciudad ti panangpapigsa iti garbage collection babaen ti panangnayon iti garbage trucks iti sumaruno a tawen.
Kabayatanna, inbatad ni Mayor Alcid a masapul ti panagtitinnulong ken disiplina ti umili tapno maurnos ti problema iti basura imbes nga ipabasol laeng iti lokal a gobierno.
