LAOAG CITY – Silulukat ni Presidente Ferdinand Marcos Jr. a makisarita ken ni Vice President Sara Duterte no kiddawen na daytoy.
Daytoy ti nagbalin a sungbat ti Malakanyang kalpasan nga adda ti naiwaras iti social media a maipagarop nga agkidkidaw ti private meeting ti Bise Presidente iti presidente iti baet ti bumarbara nga isyu iti pulitika.
Segun ken ni Palace Press Officer Atty. Claire Castro, awan ti kumpirmasyon ti nagwaras iti social media a kalikagom ti bise presidente ti makisarita ken ni Presidente Marcos Jr., ngem no mapasamak daytoy ket silulukat met ti presidente.
Innayon na nga iti umuna a podcast ni Presidente Marcos Jr. ket naibaga na a silulukat a makisarita iti amin, saan laeng a ni Vice President Duterte.
Kuna pay ni Castro nga awan ti sabali a kalikagom ti presidente no saan a ti maaddaan ti napintas a panagkikinnaawatan kadagiti tattao a saan a mangayat iti panangidaulo na iti pagilian.
Agpapan ita ket awan pay ti nagbalin a komento ni Vice President Duterte mainaig iti nasao nga isyu.
