LAOAG CITY – Imbestigaren ti Malacañang no ania kadagiti 13,917 a flood control projects a naipatungpal kabayatan ti napalabas nga administrasion ti saan nga epektibo a nanglapped iti layus.
Daytoy ket kalpasan ti rakurak ni Palace Press Officer USec. Claire Castro mainaig no na-assess ti Malacañang dagiti flood control projects a saan nga epektibo kalpasan ti nakaro a layus a napasaran iti Metro Manila.
Segun ken ni USec. Castro, ur-urayenda ti report ken datos manipud iti Department of Public Works and Highways (DPWH) no ayan dagiti proyekto, no epektibo, ken no adda ghost wenno substandard projects.
Dinakamat pay ni Castro ti Sunog Apog pumping station kas maysa a proyekto a dati a saan a nasayaat ti pannakaipasdekna ngem natarimaan ken operasional kalpasan ti intervention ken panakaistimar daytoy.
Impaganetget ni Castro a kasapulan nga agtitinnulong ti gobierno ken ti publiko tapno mataming ti problema iti layus.
Agtultuloy a tamingen dagiti proyekto ti Department of Public Works and Highways (DPWH) dagiti pagkurangan iti drainage, pumping stations, ken waterways.
Nupay kasta, dagitoy ket agbalin nga awan serserbina no agtultuloy a maibelleng dagiti basura kadagiti estero ken dalan ti danum.
