LAOAG CITY – Kumpiyansa ti House prosecution panel a patas ken saan a mangidumduma dagiti senador-judges iti impeachment trial ni Bise Presidente Sara Duterte.
Segun kenni House prosecution spokesperson ken ni Lanao del Sur Rep. Zia Alonto Adiong, namnamaenda a suroten dagiti senador-judges dagiti pagannurotan ti impeachment court ken respetuenda ti proseso.
Impaganetget pay ti prosecution ti kinapateg ti personal a panagatender dagiti senador-judges kadagiti hearing.
Kinunada nga ad-adda a makatulong daytoy iti direkta a pannakakita ken pannakadengngeg dagiti saksi ken panangtingiting kadagiti statement, aramid ken wagas ti panagsungbatda.
Kabayatanna, kinuna ni Manila Rep. Joel Chua a nagsapata dagiti senador-judges nga agbalinda a politically impartial wenno unbiased iti pangngeddengda.
Segun iti prosekusion, rumbeng nga ibasar dagiti senador-judges ti pangngeddengda iti linteg, naidatag nga ebidensia ken personal nga obserbasionda bayat ti panangusig, ken saan a kadagiti politikal a konsiderasion.
Nupay kasta, inlawlawag ti prosekusion a saanda a kidkiddawen iti presiding officer a piliten dagiti senador nga agatendar ti personal, gapu ta adda pay laeng iti bileg ti impeachment court ti banag ti panagatenderda.
