LAOAG CITY – Nagtalinaed ti takder ti Malakanyang nga awan ti dakesna iti inparuk-at da nga impormasyon mainaig iti pannaka-aprubar ti travel authority ni Vice President Sara Duterte para iti Japan ita nga Agosto 19 agingga iti 24, 2026.
Segun ken ni Palace Press Officer ken Presidential Communication Office Undersecretary Atty. Claire Castro, inaprubaran ti Office of the President ti travel authority idi Agosto 17, iti oras ti alas-12:41 ti malem.
Nupay kasta, idi kalman Agosto 18, iti oras ti alas-6:07 ti rabii ket kiniddaw ti Office of the Vice President iti babaen ni Chief of Staff Atty. Zuleika Lopez a kanselaren ti travel authority ti bise presidente.
Immunan nga inbatad ni Vice Presidente Duterte a nagbaliw ti travel plans na ken kwinestyunaran ti pannakaipublikar ti schedule na gapu ta maipagarop a mabalin a mangitunda iti risgo ti seguridad na.
Nupay kasta, inpetteng ni Castro, a kas public official, karbengan ti publiko a maamoan ti pakausaran ti pondo ti gobierno, aglalo ket maipagarop nga umab-abot iti P7 milyon ti magastos para iti security ken staff ti bise presidente kadagiti biyahe na.
Inpaganetget ni Castro, a “deserve” dagiti Pilipino a maamoan no sadinno ti pakaikabkabilan ti pampubliko a pondo.
