LAOAG CITY – Umaboten iti P717.4 milyon ti humanitarian assistance a naibunong ti administrasyon Marcos kadagiti pamilya a naapektaran ti abagat ken dagiti bagyo Luis ken Maymay.
Daytoy ket basar iti Department of Social Welfare and Development wenno DSWD.
Karaman kadagiti naibunong ti nasurok a 1.05 milyon a family food packs, 17,291 ready-to-eat food ken 12,740 non-food items.
Nangilatang pay ti Department of Social Welfare and Development ti P2.2 milyon a financial assistance iti babaen ti Assistance to Individuals in Crisis Situation (AICS).
Segun ken ni Department of Social Welfare and Development Secretary Rex Gatchalian, agtultuloy ti relief operations gapu ta agarop maysa a bolanen a makapaspasar ti agsasaruno a weather disturbance ti pagilian.
Basar iti datos agingga idi Martes, Agosto 18, addan ti 4,516 a barangay ti naapektaran, nga addaan ti nasurok a 1.5 milyon a pamilya.
Adda met ti 461 nga evacuation centers ti maus-usar iti agdama.
Kabayatanna, umabot iti 1,993 a balay ti naireport a nadadael, no sadinno a 206 ditoy ti totally damaged ken 1,787 ti partially damaged.
