LAOAG CITY – Nangipasa ti resolusion ti Sangguniang Panlungsod ditoy siudad ti Laoag kas pammigbig iti kaunaan a naka-develop ti social media application a naawagan ti AyatKo App iti pagilian a Pilipinas.
Inbatad ni Sangguniang Panlungsod Michael Fariñas a ti nasao a developer ket ni Mr. Aurelio Almazan a tubo iti Barangay Cavit iti nasao met laeng a siudad.
Kuna ni Fariñas a daytoy ket dakkel a pammadayaw kangrunaan ta maysa nga Ilokano ti developer a tubo iti siudad ti Laoag.
Iti babaen t resolusion, maipaayan ni Mr. Almazan ti pammigbig kas panagyaman ti konseho ken agserbi nga inspirasion iti benneg ti teknolohiya.
Maipalagip a kuna ni Mr. Almazan a ti nasao nga app ket para laeng kuma iti pamilyada ngem nagdesision daytoy a pagbalinen nga accessible para iti amin gapu iti nagduduma a napintas a features ti app.
Innayonna a no ti China, Japan, ken Estados Unidos ket addan ti bukod da a social media applications ket panawen metten tapno iti pagilian a Pilipinas ti mangpartuat ti kastoy nga app.
