LAOAG CITY – Kinarit ni Vice President Sara Duterte ti Malacañang nga ipublikar ti amin a travel authority nga iparparuk-at na para kadagiti opisyal ken empleado ti gobierno, karaman ti magasgastos ti gobierno iti panagbiyahe da.
Daytoy ket kalpasan nga inbutaktak ti Malakanyang ti plano na a panagturong idiay Japan.
Nupay kasta, immunan nga inlawlawag ti Malakanyang nga awan ti magastos ti gobierno iti nasao a panagbiyahe koma ti bise presidente.
Immuna iti daytoy, kinanselar ni Vice President Duterte ti travel authority na idi Agosto 18 kalpasan a nagbaliw ti plano na.
Gapu iti daytoy, kinarit ti bise ti Malakanyang nga ipakita met it publiko dagiti travel authority ti amin a government offices.
Segun ken ni Duterte, saan a rumbeng a maysa laeng nga opisina ti kidkiddawen ti transparency ken accountability.
Kiniddaw na pay nga iparuk-at ti maiyannatop a travel expenses ken panangusar ti public funds para kadagiti biyahe dagiti opisyal.
Kwinestyunaran pay ti bise presidente ti sumagmamano a report maipanggep iti plano na a panagturong iti Japan a kunana ket saan pay a panaawen kalpasan a nagbaliw dagiti plano na.
Kiniddaw na kadagiti media organization a siguradwen nga usto impormasyon sakbay nga ipublikar.
Nagballaag met ni Vice President Duterte a ti agtultuloy a pannakaibutaktak ti schedule na ket mabalin a makaapektar iti seguridad ken kinatalged na.
Kabayatanna, inkalintegan ni Palace Press Officer Usec. Claire Castro, a maysa a public official ni Duterte ken us-usaren na ti pondo ti gobyerno para iti security ken staff na a maipagarop nga umab-abot ti P7 million isut gapuna a rumbeng laeng a maamoan ti publiko no sadinno ti pakaus-usaran ti kwarta ti umili.
