LAOAG CITY – Suportaran ni Interior and Local Government Secretary Jonvic Remulla ti naisingasing a total ban iti Roblox kalpasan ti fatal shooting idiay Ateneo de Zamboanga University.
Nangipaay daytoy ti panagdanag iti naranggas nga online content ken ti posible nga epektona kadagiti agtutubo, nangruna dagiti first-person shooter games.
Segun ken ni Remulla, nakadkadlaw ti kapada ti sumagmamano a paset ti panagpaltog ti Ateneo kadagiti video games.
Kinunana pay a mabalin nga adda “undue influence” ken desensitization iti kinaranggas gapu kadagiti ay-ayam a maay-ayam iti online.
Kabayatanna, kinuna ti Roblox idi Marso nga addaan kadagiti addang a naipasdek para iti kinatalged dagiti ubbing, agraman dagiti filter kontra iti panangibinglay iti personal nga impormasion, panangsukimat iti edad sakbay a makastrek iti chat, AI detection systems, monitoring teams ken user reporting tools.
Iti insidente idiay Ateneo de Zamboanga idi Martes, dua nga estudiante ti natay ken di kumurang nga innem ti nasugatan.
Dagiti dua a paltog a naaramat iti insidente ket adda pakainaiganna iti maysa nga empleado ti Bureau of Customs (BOC) nga ama ti suspek.
