LAOAG CITY – Nagpannawagan ti Game Developers Association of the Philippines (GDAP) a saan a pabasolen dagiti nagannak kadagiti parikut iti kinatalged dagiti ubbing iti online, no diket nasaysayaat ti pannakaammoda maipapan kadagiti kontrol dagiti nagannak a magun-odan kadagiti gadget ken online platform.
Kabayatan ti hearing ti Senate Committee on Women and Children nga indauluan ni Sen. Risa Hontiveros, kinuna ni GDAP President Ria Lu a mabalin nga adu a nagannak ti saan a makaammo kadagiti safety features a magun-od iti cellphone ken online platforms-da.
Segun ken ni Lu, uray dagiti responsable a nagannak ket di inggagara a maisango dagiti annakda iti di umno a linaon no usarenda ti selpon dagiti nagannakda nga awan ti naaktibo a parental controls.
Gapu iti daytoy, insingasingna nga ipangpangruna ti panangisuro kadagiti nagannak no kasano ti agusar kadagiti ramit a mangsalaknib. Saan a kasapulan nga agbalin dagiti nagannak nga eksperto iti teknolohia, ngem napateg nga ammoda no kasano a salakniban dagiti annakda iti online.
Insingasing pay ni Lu ti kaadda ti digital literacy classes iti elementaria ken high school tapno masursuro dagiti ubbing no kasano ti agusar iti internet a natalged ken responsable.
Segun kenkuana, nasken a maisuro dagiti ubbing nga agbalin a responsable a “digital citizens” nga ammoda a salakniban ti bagbagida iti online, liklikan dagiti dakes nga impluensia ken saan a makadangran iti sabsabali.
Inpetteng ti GDAP a masapul a maedukaran dagiti nagannak maipapan kadagiti kontrol dagiti nagannak ken isagana dagiti ubbing para iti natalged ken responsable a pannakausar ti digital a lubong.
