LAOAG CITY – Agsentro ti panagsagana ni Pinay tennis star Alex Eala iti prestihiyoso nga US Open a maisayangkat iti New York manipod iti Agosto 30 agingga iti Setyembre 13 ita a tawen.
Nasapa a nalpas ni Eala iti Cincinnati Open no sadinno a nadanun iti third round ngem naabak kontra ken ni world No. 10 Amanda Anisimova ti Amerika iti iskor a 6-4, 4-6, 2-6.
Napintas a gundaway daytoy para ken ni Eala gapu ta makainana a naimbag ken makasagana a nasayaat sakbay a lumaban iti US Open.
Maipalagip nga iti laeng kallabes ket nagun-od ni Eala ti kaunaan a WTA Tour title na kalpasan nga inabak na ni Jessica Pegula iti finals ti Mubadala DC Open.
Basar iti agdama a pwesto ni Eala iti WTA live rankings, maysa daytoy kadagiti agbalin a seeded players.
No saan nga agbaliw ti rankings, tugawan ni Eala ti No. 18 a puwesto iti kanito nga iparuk-at ti WTA ti baro nga official rankings intono Lunes, Agosto 24.
