LAOAG CITY – Inbatad ti Philippine National Police iti panagdengngeg ti Senado nga adda ti motibo ti estudyante ti Ateneo de Zamboanga University (AdZU) a sumrek iti pagadalan tapno pumaltog sakbay a kinettel na ti bukodna a biag.
Iti panagdengngeg ti Senate Committee on Women and Children, inbatad ni Zamboanga City Police Director Police Colonel Fidel Fortaleza a maysa kadagiti kitkitaen nga anggulo ti imbestigasyon da ket no kasanu a nakastrek ti estudyante iti pagadalan nga adda ti bitbitna a dua a lisensyado a paltog.
Malaksid iti daytoy, rumrumuar a nangipakita ti Grade 8 student ti intensyon a liklikan ti security checks tapno maiserrek ti paltog.
Maibasar iti inisyal nga imbestigasyon, nailugan ti estudyante iti maysa a pickup truck nga addaan ti bag a nakaipalaunan dagiti paltog.
Imbes a magna iti main gate ti pagadalan no sadinno nga adda dagiti securty guard, naibaba ti estudyante iti ramp area no sadinno a basbassit ti nakaikabil a security personnel.
Ditoyen a nakastrek ti estudyante ken nagturong iti fourth floor ti pasdek.
Kinumpirmaran met ni Ateneo de Zamboanga University Board of Trustees Chairman Pedro Rufo Soliven a ti nasao a ramp ket naipagagangay nga us-usaren dagiti persons with disability wenno dagiti estudyanteng nga addaan ti injury.
Inbatad na pay nga adda ti 25 a security guards tin aka-assign iti nagduduma nga entry points ti pagadalan.
Apaman a nakastrek iti Junior High School building, nagderetso ti estudyante iti fourth floor.
Immuna a nagpaputok ti paltog iti Room 405, sakbay nga immakar iti Room 404, no sadinno a natamaan ken natay ti pinaltugan na a pada na nga estudyante, kalpasan na ket immuli iti fifth floor nga isu metten ti nagpakamatayan na.
Inpakaammo ti nailian a pulisya a nakita mismo dagiti nagresponde a police officer ti insidente ken ginandat da pay a kasarita ti suspek tapno ibaba na ti paltog na.
Kabayatanna, agtultuloy paylaeng ti forensic examination ti cellphone ti estudyante, ken tingtingitingen ti nailian a pulisya ti possible a pagsungsungbatan ti ama ti estudyante, nga akinbagi iti maysa kadagiti paltog.
Saan met pay a makumpirmaran ti liderato ti Ateneo de Zamboanga University dagiti report nga adda ti immuna a pangta iti pagadalan sakbay ti pammaltog.
