LAOAG CITY – Inbatad dagiti prosecutors ti International Criminal Court (ICC) nga addan iti posisyon da ti pakabuklan a 2,279 nga ebidensya a maibilang kas “incriminating” iti kaso kontra ken ni dati a Presidente Rodrigo Duterte.
Basar iti International Criminal Court, dagiti items ket karaman kadagiti 6,909 nga ebidensya a naibutaktak babaen ti prosecution team sakbay ti panangusig ken ni Duterte into Nobyembre ita a tawen.
Iti pakaammo manipod iti prosekusyon a napetsaan ti Agosto 5, inbutaktak ti panel dagiti ebidensya maibasar iti pagannurutan ti korte.
Manipod kadagiti naisumitir nga ebidensya ket 2,279 ti maibilang kas “incriminating,” no sadinno a dagitoy ti mangipaneknek a guilty ti nasao nga akusado.
Kabayatanna, adda pay ti 4,573 nga ebidensya a “classified” iti babaen ti Rule 77, no sadinno a dagitoy nga items ket “tangible evidence” a masapol a mapulubusan ti depensa nga agsukisok iti bukodn nga oras, pakairamanan ditoy dagiti libro, dokumento, ladawan ken dadduma pay.
