LAOAG CITY – Ad-adda a paigetan ti Department of Education (DepEd) ti panagbantay da iti masansan a panaglangan wenno panagabsent dagiti estudyante kas possible a “red flag” nga agkasapulan ti nasapsapa nga interbensyon.
Daytoy ti inbatad ni Department of Education Undersecretary Malcolm Garma iti panagdengngeg ti Senado mainaig kadagiti insidente ti pammaltog kadagiti pagadalan iti ciudad ti Tacloban ken Zamboanga City.
Inlawlawag na a mabalin a marigatan dagiti mangisursuro a dagus a makaobserbar ti pattern ti panaglangan gapu iti kaado dagiti estudyante nga ig-iggaman da.
Gapu iti daytoy, kalikagom ti Department of Education nga ad-adda a seryosos ti panangsubaybay ti attendance dagiti agad-adal.
Ad-adalen met ti departamento ti panagusar ti artificial intelligence (AI) tapno maestablisar ti attendance patterns ken dadduma pay nga indikasyon a mabalin nga agkasapulan ti dagus a panangtutuk iti maysa nga estudyante.
Paset daytoy ti panangpapigsa ti threat assessment system ti Department of Education kalpasan dagiti insidente ti kinadamsak kadagiti pagadalan.
Segun ken ni Garma, karaman kadagiti tingtingitingen ti Department of Education ti behavioral patterns ken dadduma pay a risk indicators.
