LAOAG CITY – Manamnama ti panangiprisintar ti House prosecution team dagiti opisial ti Philippine Statistics Authority (PSA) iti impeachment trial kontra ken ni Vice President Sara Duterte, segun ken ni House Prosecutor Terry Ridon.
Segun kenkuana, daytoy ket tapno mapaneknekan dagiti alegasion a “fictious” wenno saan nga umno dagiti indibidual a nakaikabilan ti confidential funds ti Office of the Vice President (OVP).
Innayonna pay a karaman kadagiti opisial ti Philippine Statistics Authority (PSA) nga agbalin a testigo iti alegasion ti misused ti confidential funds gapu ta isuda ti nangiwayat ti panangtingiting tapno maibulgar daytoy iti House Inquiry no sadinno ket agpampammarang iti nasao a panangtingitingda a dagiti nagan iti acknowledgement receipts kas ken ni Mary Grace Piatto, Milky Secuya ken kadagiti dadduma pay ket awan iti rekordda.
Gapu iti daytoy, agpampammarang a saan nga umno ken saan nga agpayso dagiti nadakamat nga indibidual, a kayatna a saoen nga adda ti anomalia ken saan nga umno a panagusar iti pondo ti pagilian.
Mainaig iti daytoy, immunan nga inrakurak ti kampo ti bise presidente idi Pebrero a nakasaganada nga ilawlawag ti panagusar kadagiti “alias” para iti confidential funds kas iti makueskuestionaran a recipients a da “Mary Grace Piattos.”
